മികച്ചതും ഉപകാരപ്രദവുമായ ടേം ഇൻഷുറൻസ് പോളിസി കണ്ടെത്തുന്ന വിഷയത്തിൽ നിരവധി സംശയങ്ങളും സന്ദേഹങ്ങളുമൊക്കെ ഒരു സാധാരണക്കാരന്റെ ഉള്ളിൽ നുരഞ്ഞുപൊന്താം. ശ്രദ്ധാപൂർവം വിവരങ്ങൾ പരിശോധിച്ചശേഷം വേണം ടേം ഇൻഷുറൻസ് പോളിസി വാങ്ങേണ്ടത്. ഇതിനായ ഏഴ് ഘടകങ്ങളാണ് പ്രധാനമായും കണക്കിലെടുക്കേണ്ടത്. ഇതു സംബന്ധിച്ച വിശദാംശമാണ് ഇതിൽ ഉൾപ്പെ‌ടുത്തിയിട്ടുള്ളത്.

ഏറ്റവും ചെലവു കുറഞ്ഞ രീതിയിലും എന്നാൽ ഫലപ്രദവുമായി ഇൻഷുറൻസ് പരിരക്ഷ ഉറപ്പാക്കുന്നതിനുള്ള മികച്ച മാ‌ർഗങ്ങളിലൊന്നാണ് ടേം ഇൻഷുറൻസ് പദ്ധതികൾ. ഒരു ടേം ഇൻഷുറൻസ് പോളിസി എ‌ടുക്കുമ്പോൾ ശ്രദ്ധിക്കേണ്ട പ്രധാന ഏഴ് ഘ‌കങ്ങൾ ചുവടെ ചേർക്കുന്നു.

പരിരക്ഷ എത്രയെന്ന് തീരുമാനിക്കുക : നിങ്ങളുടെ ധനപരമായ ഉത്തരവാദിത്തം വിലയിരുത്തുക എന്നതാണ് ടേം ഇൻഷുറൻസ് വാങ്ങുന്നതിനുള്ള പ്രാഥമിക ചുവടുവെപ്പ്. വായ്പകൾ, വീട്ടുചെലവ്, ഭാവിയിലെ സാമ്പത്തിക ലക്ഷ്യങ്ങൾ എന്നിങ്ങനെയുള്ള വിവിധ ഘടകങ്ങൾ പരിഗണിക്കണം. നിങ്ങളുടെ അസാന്നിധ്യത്തിലും ആശ്രിതരുടെ ആവശ്യങ്ങൾ നിറവേറ്റാൻ പര്യാപ്തമായ തുക വേണം പരിരക്ഷയായി (കവറേജ്) നിശ്ചയിക്കേണ്ടത്. ഇതിനോടൊപ്പം പണപ്പെരുപ്പവും ഭാവിയിൽ വന്നുചേരാവുന്ന ബാധ്യതകളും കൂടി കണക്കിലെടുക്കണം. ഇങ്ങനെ മതിയായ പരിരക്ഷ ഉറപ്പാക്കിയാലാണ് ആശ്രിതർക്കും പ്രിയപ്പെട്ടവർക്കും അല്ലലില്ലാതെ കഴിഞ്ഞുകൂടാൻ സാധിക്കുക.

പോളിസിയുടെ വ്യവസ്ഥകളും നിബന്ധനകളും പരിഗണിക്കുക. പോളിസിയിൽ ഒഴിവാക്കിയിട്ടുള്ള സേവനങ്ങളും പരിശോധിക്കുക. ഇതിനായി പോളിസി ഡോക്യുമെൻ്റ് സൂക്ഷ്മമായി വായിക്കുക, അന്വേഷിക്കുക. അതുപോലെ പ്രീമിയം തുക, പ്രീമിയം അടവിൻ്റെ കാലയളവ്, പോളിസി കാലാവധി, ക്ലെയിം തീർപ്പാക്കാനുള്ള നടപടിക്രമങ്ങൾ എന്നിവയും അന്വേഷിക്കുക.

മികച്ച ഇൻഷുറൻസ് കമ്പനിയെ തെരഞ്ഞെടുക്കുക. ഇതിനായി ക്ലെയിം സെറ്റിൽമെൻ്റ് അനുപാതം, ഉപഭോക്താക്കളുടെ അഭിപ്രായം (റിവ്യൂ), കമ്പനിയെ കുറിച്ച് വിപണിയിലുള്ള മതിപ്പ്, പ്രശസ്തി, ഉപഭോക്തൃ സേവനം എന്നിവയെ കുറിച്ച് അന്വേഷിക്കുക. വിവിധ കമ്പനികളെ തമ്മിൽ താരതമ്യം ചെയ്യുക.

പോളിസിയുടെ പ്രീമിയവും ആനുകൂല്യങ്ങളും താരതമ്യം ചെയ്യുക. സേവനത്തിനൊത്ത് ചെലവ് താങ്ങാവുന്ന നിരക്കിലാകണം. എന്നിരുന്നാലും കുറഞ്ഞ പ്രീമിയം തുക മാത്രം വാങ്ങാനുള്ള മാനദണ്ഡമാക്കരുത്.

കൃത്യവും യഥാർത്ഥവുമായ വിവരങ്ങൾ മാത്രമേ ഇൻഷുറൻസ് കമ്പനികളിൽ അപേക്ഷ സമർപ്പിക്കുന്ന വേളയിൽ നൽകാവൂ. ആരോഗ്യപരമായ വിവരങ്ങളും പുകവില, മാദ്യപാനം പോലുള്ള ശീലങ്ങളെ കുറിച്ചും കൃത്യമായ വിവരം ബോധിപ്പിക്കുക. ഇല്ലെങ്കിൽ പിന്നീട് പോളിസി ക്ലെയിം ചെയ്യുമ്പോൾ തള്ളിക്കളയാൻ സാധ്യതയുണ്ട്.

റൈഡർ/ ആഡ്-ഓൺ : ടേം ഇൻഷുൻസ് പോളിസികൾക്കൊപ്പം റൈഡർ അല്ലെങ്കിൽ ആഡ്-ഓൺ സേവനങ്ങൾ ലഭ്യമാണോയെന്ന് നോക്കുക. ക്രിട്ടിക്കൽ ഇൽനെസ് കവർ, ആക്സിഡന്റൽ ഡെത്ത് ബെനിഫിറ്റ് എന്നിങ്ങനെയുള്ള റൈഡർ എന്നിവയൊക്കെ പോളിസി യുടെ പരിരക്ഷ വർധിപ്പിക്കുന്ന ഘ‌ടകമാണ്. എന്നിരുന്നാലും ഇതിനുവേണ്ടി അധികമായി ചെലവിടേണ്ട തുകയും അതിലൂടെ കൈവരാവുന്ന ആനുകൂല്യങ്ങളും തട്ടിക്കിഴിച്ച് വിലയിരുത്തണം.

നിരന്തരമായി വിലയിരുത്തണം : ആർക്കും ജീവിത സാഹചര്യങ്ങൾ എങ്ങനെ മാറിമറിയുമെന്ന് പ്രവചിക്കാൻ സാധ്യമല്ല. അതിനാൽ നിങ്ങളുടെ ടേം ഇൻഷുറൻസ് പോളിസിയെ കുറിച്ച് ഇടവേളകളിൽ വിലയിരുത്തുക. വിവാഹം, കുട്ടികളുടെ ജനനം എന്നിങ്ങനെയുള്ള ജീവിതത്തിലെ പ്രധാനപ്പെട്ട സംഭവങ്ങൾ അരങ്ങേറുമ്പോൾ ഇൻഷുറൻസ് പരിരക്ഷയും വർധിപ്പിക്കേണ്ടിവരും.